حكايات بابا ودودو
الحكايه الاولى - العاب اونلاين
👇لو عاوزين تشوفوا القصه معموله كارتون وانيميشن تقدروا تشوفوها من هنا
حكايات بابا ودودو- الحلقه الاولى - العاب اونلاين
(1)
جرس الباب يدق
تظهر الام فى المطبخ وهى تنادى على
ادم
الام :
يا ادم ..... شوف مين على الباب
|
|
جرس الباب يدق مره اخرى
الام
انت فين يا ادم ... جرس اباب بيرن .. وانا ايدى مش فاضيه
جرس الباب يدق مره اخرى
الام : يووووه ...
هاروح انا افتح ... انا مش عارفه ادم مش سامعنى ليه
(2)
يظهر الاب عند باب الشقه
الام تستقبل الاب
الاب : كل دة سايبننى على الباب وانا جاى من بره ولجو حر جدا
.... ينفع كدة
الام تشتكى
الام : معلش والله يا ابو ادم ... بس انا فضلت اندة على ادم
كتير جدا وهو مش سامعنى خالص انا مش عارفه ايه الموضوع
الاب يهدئها
الاب : سيبينى بس ادخل اخد دش احسن الجو ناااااا....وبعد كدة
نشوف موضوع سى ادم
(3)
ادم يجلس على طاوله الكمبيوتر منهمك فى اللعب
يضع السماعات
الاب : ازيك يا ادم
ادم لايسمعه
الاب يرفع صوته قليلا
الاب : ازيك يا دودو
ادم لايسمعه
الاب يرفع صوته عاليا
الاب : يا
ااااددددمممم
ادم ينتبه لصوت والده
يلتفت اليه بهدوء
ادم: ايه دة بابا ؟...... انت جيت امتى
الاب بغضب
الاب : جيت من بدرى يا استاذ ... وفضلت ارن الجرس كتير
ادم معتذرا
ادم : معلش يابابا .. ماسمعتش الجرس
الاب بغضب
الاب : وماسمعتش كمان ماما وهى بتنادى عليك عشان تفتحلى
ادم معنذرا
ادم :
الصراحه سمعتها
الاب بدهشه
الاب : يعنى سمعت ماما بتنده عليم ... وماردتش عليها؟
ادم بخجل
ادم : ... اصلى صوت اللعبه دى عالى قوى وكنت وصلت مرحله مهمه فى اللعبه وكنت خايف اخسر
الاب بدهشه
الاب : انت عارف انت عملت ايه ... انت فضلت انك ماتخسرش فى
اللعبه على انك تشوف ماما محتاجاك ليه؟
الاب باستنكار
الاب : لا يا ادم ... التصرف اللى انت عملته دة مش صح ولازم تخرج تعتذز لماما عن التصرف دة ..
وتوعدها انك مش هاتكرره تانى
ادم : حاضر يابابا
(4)
ادم يجلس على الكرسى
بجوار والدته
وجوارهم والده
الاب : ادم جاى يعتذرلك يا ماما ... شان كان سامعك بتندهى
عليه وماردش عليكى
الام : يعنى انت كنت سامعنى يا ادم ... وماردتش عليا
ادم : هو الصراحه .. كنت سامعك طشاش كدة
الام : طشاش ... ليه وقعت على ودنك وانت صغير ...ولا حاكياتك
ايه بالظبط
ادم : متهيالى محتاجك تتدخل هنا يا بابا
الاب : اهدى بس يا نجوى ... هو مش قصدة .. هو بس كان لابس
السماعات والصوت بتاع اللعبه كان عالى شويه ...
الام : طب ايه رايك بقى ان الكمبيوتر دة
الاب : باس باس يا نجوى الموضوع مش كبير قوى كدة ... هو خلاص
عرف غلطته ... ومش هايكرر دة تانى.... مش كدة يا دوو
ادم : طبعا يا بابا
(5)
الاب يعمل على الجهاز الكمبيوتر الخاص به
يقوم مسرعا الى
الباب
ينادى على دودو
الاب : دودو ... يا دودو ؟.... انت فين
ياتى دودو مسرعا الى الاب
ادم : انا هنا يابابا ... محتاج حاجه ؟
الاب : ايوه يا حبيبى ... انزل بسرعه عشان تقابل عمك بسام
على اول الشارع .. واديله الورق دة عشان لازم يروح الشركه النهارده ضرورى ... وانا
لازم ارجع اكمل باقى الشغل عشان ابعته بالايميل
ادم : حاضر يابابا
(6)
ادم يدخل غرفته
لاغلاق جهاز الكمبيوتر
ادم : انا اقفل الجهاز احسن مالك اخويا يدخل يبوظ حاجه فى
اللعبه ... وبعدها انزل على طول لعمو بسام
يجلس ادم على الكمبيوتر
بدهشه
ادم : ايه ده ... ازاى المعسكر بتاعى اتضرب ... اما اشوف
مين عمل كدة
يتفحص الكمبيوتر
ادم : كان لازم اعرف ان اللى عمل كدة هو بودى ... انا بقى
هارد له الضربه فى المعسكر بتاعه واهزمه .. وبعد كدة هانزل لعمو بسام
الوقت يمر ... الوقت يمر.. فترات طويله
(7)
الاب فى وسط الغرف يصرخ
الاب : يا اااااا
داااااااام
الام تجرى الى الغرفه بارتياع
الام : ايه اللى حصل يا احمد ؟.... فى ايه ؟...
الاب يسال بغضب
لاب : فين ادم ؟...... يا اااااادااام
(8)
ادم يسمع صراخ والده عليه
مذعورا
ادم : ياخبر ... انا نسيت انزل لعمو بسام
تجه الى غرفه المعيشه
(9)
ادم والاب والام فى غرفه المعيشه
ادم بخوف
ادم : نعم يابابا ... انت بتندهلى
الاب بغضب
الاب : اه طبعا بنده لحضرتك... ممكن تقول لى انت منزلتش تدى
الورق لعمك بسام ليه؟
الام بدهشه
الام : ايه دة ..... هو مانزلش ... ؟
الاب بغضب
الاب : لا مانزلش الاستاذ.... وبسام كلمنى وقالى انه اضطر
يمشى عشان يلحق ميعاد الشغل ... وانا اعتمدت على ادم ... ودخلت اوضتى وغلبنى
النوم... صحيت على المشكله دى
الام توجه كلامها الى ادم
الام : ليه كدة يا ادم .. انا كنت شايفه الورق معاك ... ايه
اللى حصل ..ليه مانزلتش
ادم مبررا
ادم : الحقيقه انى كنت نازل ... بس خوفت مالك يبوظلى اللعبه
... قولت اقفل الكمبيوتر وانزل
الاب بعصبيه
الاب : وماقفلتهوش ليه؟؟؟ ونزلت ؟؟؟
ادم بخجل
ادم : اصل لقيت بودى ابن خالتو عبير .. دخل هجم على المعسكر
بتاعى ودمره ...قولت لازم اهجم عليه.. وادمر له معسكره هو كمان
الاب مشلولا
الاب : يعنى عشان المعسكر بتاعك اللى اتدمر دة ... انا
هايتخصم لى فلوس من مرتبى ... ايه رايك بقى فى الموضوع دة
ادم : معلش يابابا ....
انا اسف يابابا ...
الاب بعصبيه
الاب : انا هانزل بسرعه بالعربيه احاول انقذ الموقف .. وايه
رايك بقى ان الكمبيوتر دة
الام تتدخل
الام : باس باس يا احمد الموضوع مش كبير قوى كدة ... هو خلاص
عرف غلطته ... ومش هايكرر دة تانى.... مش كدة يا دودو
ادم: طبعا يا ماما
(10)
ادم يجلس على الكمبيوتر
يحاول تشغيله
لايستجيب
ادم : هو ايه اللى حصل للكمبيوتر مش عوز يشتغل ليه ؟
بتعصب جدا على الجهاز
(11)
الام والاب يجلسان على الاريكه
يدخل ادم غضبان
ادم : بابا ... ماما .... الكمبيوتر مش عاوز يشتغل ..و مش
عارف ايه المشكله
الاب : ليه مش عاوز يشتغل ... انت مش كنت بتلعب بيه امبارح
كويس ؟
ادم : ايوه .. وكمان شغال كويس جدا... بس النهارده مش عاوز
يشتغل ؟
الام : طب اتاكدت من الوصلات بتاعه الكهرباء ؟
ادم بعصبيه
ادم : اه كل حاجه سليمه ... انا هاتجنن ليه مش بيتشغل ...
ادم باستسلام
ادم : اكيد مالك اللى بوظه ... ماشى يا مالك ؟
ادم ينصرف
الام والاب ينظران لبعضهم البعض
يغمزون لبعضهم
تعليقات
إرسال تعليق
لو عجبتك حلقاتنا اكتبلنا كلمه حلوه تشجعنا